Category: Newyddion

Rheolwr Cyfathrebu ac Ymgysylltiad

Lleoliad: De Cymru (Caerdydd a Chasnewydd)
Oriau: Rhan-amser (30 awr/wythnos, wythnos o 4 diwrnod hyblyg)
Cyflog: £30,000 (yn ôl yr un gyfradd, cyfwerth ag amser llawn £37,500)
Cytundeb: Cyfnod penodol tan 28ain Chwefror 2027

A ydych chi’n frwdfrydig ynglŷn â phobl, galluogi cymunedau ac ynni glân? Mae Ynni Teg ar genhadaeth i ddod ag ynni fforddiadwy, ym meddiant y fro i gymunedau yng Nghymru ac mae angen i ni fod â Rheolwr Cyfathrebu ac Ymgysylltiad ar gyfer helpu i wneud i hynny ddigwydd!

Fe fyddwch chi’n arwain gwaith maes ar gyfer prosiect ymchwil a datblygiad newydd, gan weithio gyda’r Bengal Dragons Foundation i ymgysylltu â chymunedau trefol amrywiol yng Nghaerdydd a Chasnewydd.  

O fod yn trefnu ymweliadau â chartrefi a gweithio gyda thrigolion lleol hyd at ddylunio ymgyrchoedd Cysylltiadau Cyhoeddus a rheoli’r berthynas â rhanddeiliaid, fe fyddwch chi wrth galon prosiect a allai drawsnewid dyfodol ynni cymunedau.  Hefyd, fe fyddwch chi’n arolygu tîm bychan ac yn sicrhau y bydd y prosiect yn gynhwysol, yn ddylanwadol ac yn barod ar gyfer y cam nesaf o’i weithrediad.

Rhesymau i Ymuno â Ni

• Wythnos waith hyblyg 4-diwrnod—am fod cydbwysedd rhwng gwaith a bywyd yn bwysig
• Cyfle i fod â dylanwad gwirioneddol wrth herio anghydraddoldeb ynni
• Swydd y bydd eich llais a’ch syniadau yn llunio dyfodol ynni cymunedol
• Byddwch yn rhan o dîm bychan sy’n gyfeillgar a chefnogol

Gwnewch Gais Nawr!

Anfonwch eich CV a llythyr eglurhaol i jude@ynniteg.cymru

Dyddiad cau: Dydd Llun 14^ydd Ebrill canol dydd

Ymunwch â’r mudiad am ddyfodol ynni glanach a thecach!

Dyma Jon, Cyfarwyddwr Gweithredol

Beth yw eich rôl yn YnNi Teg?

Fel y Cyfarwyddwr Gweithredol, dwi’n helpu ein haelodau bwrdd gwirfoddol i ddatblygu a rheoli ein hadnoddau a’n gweithgareddau i gyrraedd nodau’r gymdeithas ac, yn allanol, yn ceisio hyrwyddo datblygiad ehangach y sector ynni cymunedol.

Dywedwch ychydig wrthym amdanoch chi’ch hun

Ar ôl ychydig flynyddoedd ansicr ar ddisberod o gwmpas y wlad yn symud o un swydd i’r llall, hyfforddais i fod yn bensaer tirwedd. Cyfunodd hyn fy niddordebau yn yr amgylchedd naturiol a chynllunio a dylunio’r byd a wnaed gan ddyn. Daeth fy swydd broffesiynol gyntaf â mi i Gaerdydd am yr hyn roeddwn i’n meddwl fyddai’n ychydig flynyddoedd, ond 30 a mwy o flynyddoedd yn ddiweddarach dwi’n dal i fyw’n hapus yma gyda fy nheulu. Yn ystod y cyfnod hwnnw, dwi wedi gweithio yn y sectorau cyhoeddus, dielw a masnachol ac wedi bod yn rhan-berchennog a chyfarwyddwr mewn sawl busnes llwyddiannus ac aflwyddiannus, gan gynnwys cwmni datblygu ffermydd solar a chwmni cyflenwi ynni. Dwi hefyd yn gyfarwyddwr gwirfoddol gyda TrydaNi-Chargeplace Wales Ltd, menter gymdeithasol sy’n anelu at sefydlu rhwydwaith o glybiau rhannu ceir trydan ledled Cymru.

A phan nad ydych chi yn y gwaith?

Dwi’n darllen llawer – llyfrau hanes a nofelau ffuglen wyddonol neu ysbïo yn bennaf. Dwi hefyd yn mwynhau teithio ar hyd cilffyrdd a ffyrdd cefn Cymru – ar droed neu ar gefn beic modur – a gwneud ambell brosiect DIY achlysurol, er nad ydw i’n dda iawn gyda hynny.

Rydyn ni’n falch o gyhoeddi bod Ynni Teg wedi derbyn cyllid ar gyfer y prosiect Gwyrdd Bangla yn ne Cymru.  Gan weithio gyda’r Bengal Dragons Foundation, bydd y fenter hon yn dod â phaneli solar ffotofoltaig, storfa fateri, gwresogi solar, a thechnoleg gwefru ceir trydan i saith mosg ac adeiladau cymunedol – gan helpu i leihau allyriadau carbon a chostau ynni, a dod â dyfodol gwyrddach i ni i gyd.

Mae’r cam hwn yn cael ei ariannu gan Ynni Cymru, gyda chymorth Gwasanaeth Ynni Llywodraeth Cymru. Diolch o galon i’n partneriaid ac i bawb am gefnogi’r daith hon tuag at Gymru lanach a mwy cynaliadwy.

Aráe paneli solar ffotofoltaig newydd i gyd-fynd â thyrbin gwynt presennol YnNi Teg 

Mewn datblygiad newydd cyffrous yn y sector ynni cymunedol yng Nghymru, mae YnNi Teg a’n contractwr Vital Energy, wedi cwblhau adeiladu ac integreiddio fferm solar ffotofoltaig newydd gyda’n tyrbin gwynt presennol ar Fferm Bwlchgwynt, ger Meidrim, Sir Gaerfyrddin.

Mae cyfuno ynni’r gwynt sydd ar ei gryfaf yn y gaeaf gydag ynni’r haul sydd ar ei gryfaf yn yr haf yn gam sylweddol ymlaen tuag at wneud y mwyaf o gynhyrchiant ynni glân mewn lleoliad ar y cyd. Mae’n arddangos hefyd sut y gall datrysiadau arloesol oresgyn y cyfyngiadau sydd ar y rhwydwaith dosbarthu trydan ac mae’n rhoi patrwm ar gyfer mudiadau ynni cymunedol eraill yng Nghymru.

Daeth cynrychiolwyr o Lywodraeth Cymru, staff Ynni Teg ac aelodau’r Bwrdd, ynghyd â pherchennog y tir a’r contractwr at ei gilydd ar gyfer y lansio swyddogol yng ngofal Mari Arthur, Cadeirydd y Bwrdd.  

Ymagwedd Gydweithrediadol at Ynni Adnewyddadwy 

Ers ei sefydlu yn 2017, mae YnNi Teg wedi arloesi ym maes ynni cymunedol. Mae’r sefydliad yn rhedeg tyrbin gwynt 900kW ar Fferm Bwlchgwynt, a gomisiynwyd ym mis Awst 2017. Mae’r tyrbin yn cynhyrchu 1,800–2,000 MWh o drydan yn flynyddol—digon i gyflenwi tua 500 o gartrefi. 

Nawr, drwy gynnwys aráe solar yn y gosodiadau, mae YnNi Teg yn ehangu ei bortffolio ynni adnewyddadwy, gan arddangos sut y gall technolegau gwynt a solar gyd-fynd â’i gilydd i wneud y mwyaf o allbwn ynni. Mae’r ymagwedd arloesol yn rhoi mwy o ddylanwad i gysylltiad presennol y safle â’r grid i ychwanegu 576kW o gapasiti cynhyrchiant solar. 

Datrysiadau Arloesol i Gyfyngiadau’r Grid 

Mae gallu’r rhwydwaith dosbarthu trydan, y ‘grid’, i dderbyn cysylltiadau newydd ar gyfer ynni adnewyddadwy yn gyfyngedig iawn, felly mae hi’n hanfodol i wneud y mwyaf o unrhyw allu a sicrheir. Ym Mwlchgwynt, mae cyfyngiad allforio o 900kW ar ein cysylltiad ni. Y rhan fwyaf o’r amser, mae’r tyrbin gwynt yn gweithio oddi tan y cyfyngiad hwn, gan adael capasiti “dros ben” y gellir ei ddefnyddio. Drwy ychwanegu aráe solar at y safle, fe allwn ni wneud y mwyaf o’r defnydd o’r cysylltiad presennol heb fod ag angen am un newydd, a fyddai’n anodd ei sicrhau.

I wneud yn siŵr ein bod ni’n aros o fewn y terfyn allforio o 900kW, rydym ni’n cydymffurfio â rheoliadau G100, sy’n gofyn rheolaeth weithredol o’r cynhyrchiant drwy gyfrwng pob ased a gysylltir. Ym Mwlchgwynt, mae hyn y golygu monitro’r allbwn o’r tyrbin gwynt a’r aráe solar fel ei gilydd. Pe bydd raid, gellir lleihau’r allbwn solar i wneud yn siŵr nad yw cyfanswm y cynhyrchiant yn mynd dros y terfyn. Mae rheolaeth fanwl fel hon yn caniatáu i ni ddefnyddio’r grid yn effeithlon ac integreiddio ynni adnewyddadwy ychwanegol.

“Mae hon yn enghraifft ardderchog o sut y gallwn ni wneud y mwyaf o’n hadnoddau ynni adnewyddadwy,” meddai Mari Arthur, Cadeirydd Bwrdd YnNi Teg. “Rydym ni’n gallu ychwanegu cynhyrchiant solar heb fod ag angen cysylltiad newydd â’r grid, sy’n gwneud y prosiect yn gost-effeithiol ac yn gynaliadwy yn amgylcheddol hefyd. Honno yw’r ffordd o feithrin economïau lleol sy’n fwy cadarn.”  

Ynni sy’n Canolbwyntio ar Gymunedau i’r Dyfodol 

Yn Gymdeithas Budd Cymunedol, mae YnNi Teg wedi ymrwymo i ailfuddsoddi elw yn y cymunedau lleol wrth gefnogi datblygiad y sector ynni cymunedol yn fwy eang. Mae incwm o’r tyrbin ym Mwlchgwynt eisoes yn cyfrannu at dalu llog i’n haelodau ac ariannu prosiectau cymunedol lleol fel Cyngor Cymunedol Meidrim, yr Ysgol Gynradd a’r Eglwys yno a Banc Bwyd Caerfyrddin.

Bydd yr aráe solar newydd yn cryfhau’r effaith hon, gan gynhyrchu ynni glân ychwanegol ac yn cryfhau buddiannau ariannol ac amgylcheddol eto er mwyn y gymuned. 

Edrych Ymlaen 

Dim ond megis dechrau ar uchelgeisiau mwy eang YnNi Teg y mae Aráe Solar Bwlchgwynt. Drwy roi’r prosiect hwn sy’n cyfuno’r gwynt a’r haul ar waith yn llwyddiannus, mae’r sefydliad yn gobeithio hyrwyddo mentrau tebyg ledled Cymru, gan arddangos sut y gall prosiectau ynni cymunedol oresgyn heriau technolegol ar gyfer darparu manteision sylweddol. 

“Rydym ni’n ystyried hwn yn lasbrint i’r dyfodol,” ychwanegodd Jon Townend, Cyfarwyddwr Gweithredol YnNi Teg. “Drwy gyfuno technolegau fel hyn i wneud y defnydd mwyaf effeithlon o seilwaith presennol, fe fydd y sector ynni cymunedol yn parhau i fod yn rhan effeithiol o’r pontio at ddyfodol o ynni sy’n lanach, a llai costus.’’

Fel mae’r gwynt a’r haul yn cydweithio ar Fferm Bwlchgwynt, mae YnNi Teg yn cadarnhau ei waith arweiniol o ran arloesi ym maes ynni adnewyddadwy, sy’n canolbwyntio ar y gymuned.

Mae YnNi Teg yn ddiolchgar i Lywodraeth Cymru, y Gwasanaeth Ynni a Banc Datblygu Cymru am eu cefnogaeth i wireddu’r prosiect hwn.

Cyfle i gwrdd â’n Swyddog Ymchwil a Chymorth, Weronika

Beth yw eich rôl yn YnNi Teg?

Rwy’n Swyddog Ymchwil a Chymorth. Mae fy nghyfrifoldebau’n cynnwys cynnal ymchwil wedi’i thargedu ar amrywiol agweddau ar y sector ynni, megis technolegau ynni adnewyddadwy, datblygiadau polisi a thueddiadau’r farchnad. Mae hyn yn cynnwys dadansoddi data, paratoi adroddiadau, a darparu mewnwelediad i lywio ein mentrau strategol a’n prosesau gwneud penderfyniadau.

Dywedwch ychydig wrthym amdanoch chi

Mae fy nghefndir mewn pensaernïaeth a thechnolegau pensaernïol. Cwblheais BSc mewn Dylunio a Thechnoleg Pensaernïol ym Mhrifysgol Metropolitan Caerdydd. Ar hyn o bryd rwy’n dilyn cwrs Doethuriaeth ym Mhrifysgol Caerdydd. Mae fy ymchwil academaidd yn canolbwyntio ar Systemau Ynni Lleol Clyfar yn yr amgylchedd adeiledig. Trwy fy astudiaethau ac ymchwil, fy nod yw cyfrannu at ddatblygu strategaethau blaengar sy’n trosoli technolegau clyfar i greu amgylcheddau adeiledig cynaliadwy, ynni-effeithlon.

A phan nad ydych chi yn y gwaith?

Y tu allan i’r gwaith, rwy’n mwynhau heicio a theithio. Gan fy mod yn dod o Wlad Pwyl, byddaf yn aml yn ymweld ag Ewrop i archwilio dinasoedd newydd ac ailgysylltu â’m treftadaeth. Mae gennyf ddiddordeb mawr mewn dylunio sy’n ymestyn y tu hwnt i bensaernïaeth, yn enwedig mewn dylunio cynaliadwy. Yn ogystal, rwy’n mwynhau garddio a gwrando ar gerddoriaeth.

Dyma Guy, Rheolwr Datblygu

Beth yw dy rôl yn YnNi Teg?

Dwi’n Rheolwr Datblygu a’m gwaith yw gweithio fel rhan o dîm bach i nodi a datblygu cyfleoedd newydd a darparu llif o brosiectau.  Ar hyn o bryd, dwi’n rheolwr prosiect ar gyfer gosod cynllun PV Solar 576kW wrth ymyl ein tyrbin gwynt ger Meidrim yn ogystal ag arwain ar ddatblygu portffolio o brosiectau gwifren preifat Solar PV.  

Dywedwch ychydig wrthym amdanoch chi

Yn wreiddiol o ardal Caer, ers 1972 dwi wedi byw yn Aberystwyth a’r cyffiniau. Dwi ar hyn o bryd yn byw ger pentref Llanrhystud.  Astudiais am radd BSc mewn Amaethyddiaeth a Choedwigaeth ac MSc mewn Rheoli Adnoddau Gwledig ym Mhrifysgol Bangor.  Mae gen i bron i 30 mlynedd o brofiad yn gweithio yn y sectorau cyhoeddus, preifat a chymunedol mewn rolau cyflenwi technegol a rheoli prosiectau sy’n canolbwyntio ar amaethyddiaeth, monitro amgylcheddol ac, ers 2010, prosiectau ynni adnewyddadwy. 

A phan nad ydych chi yn y gwaith?

Dwi’n gyfarwyddwr gwirfoddol ar gyfer yr Ymddiriedolaeth Shared Earth, safle 40 erw ger Llanbedr Pont Steffan sy’n cael ei reoli er lles natur sy’n darparu llety eco, cyrsiau hyfforddi a digwyddiadau.  Dwi hefyd yn gyfarwyddwr Ynni Cymunedol Grannell sy’n gweithredu tyrbin gwynt 500kW ger Cribyn yng Ngheredigion.  Dwi’n mwynhau cerdded (gyda’r ci), garddio a choginio. 

Dyma Jane, Rheolwr Datblygu

Beth yw eich rôl yn YnNi Teg?

Fel Rheolwr Datblygu, dwi’n darparu llif o brosiectau ac yn ceisio datblygu cyfleoedd newydd.  Gall hyn fod fel cyswllt arweiniol neu’n gweithio o fewn y tîm i gyflawni prosiectau amlweddog, er enghraifft gweithio gyda chymuned Fangladeshaidd gorllewin Cymru i fod yn fwy cynaliadwy a lleihau eu heffaith ar newid hinsawdd.

Dywedwch ychydig wrthym amdanoch chi

Dwi’n wreiddiol o Lerpwl ac wedi byw a gweithio mewn gwahanol ardaloedd ledled Cymru cyn ymgartrefu yn Sir Benfro yn 2008. Astudiais am radd BA mewn Astudiaethau Amgylcheddol ym Mhrifysgol Bangor a dyfarnwyd MSc mewn Rheoli Ynni a Chadwraeth (Eng) i mi o Brifysgol Middlesex.  Ers dros chwarter canrif, dwi wedi gweithio yn y sectorau cyhoeddus, preifat a chymunedol mewn rolau datblygu sy’n canolbwyntio ar effeithlonrwydd ynni a phrosiectau ynni adnewyddadwy.

A phan nad ydych chi yn y gwaith?

Dwi’n byw ar dyddyn sy’n edrych dros fryniau’r Preseli, mae gennym fusnes eco bach sy’n cynnig unedau glampio oddi ar y grid a gwersylla. Rydyn ni wedi gweithio i ddenu bywyd gwyllt a chynnig hafan i adar, ystlumod a chreaduriaid eraill.  Dwi’n mwynhau cerdded y ci, ymweld â’r traeth a llawer o lefydd eraill yn yr ardal – a bwyd da! 

Fe wnaethom ni wahodd busnesau a sefydliadau lleol i ymuno â ni a’n partner brosiect Ynni Sir Gâr am frecwast ar gyfer lansiad swyddogol Prosiect Ynni Cymunedol Tref Caerfyrddin. 

Gan weithio ar ran Cyngor Tref Caerfyrddin, rydym ni’n cynnig asesiadau ynni rhad ac am ddim i helpu busnesau/sefydliadau lleol i nodi meysydd lle gallant optimeiddio defnydd ynni. 

Bydd y wybodaeth hon yn ein helpu ni i nodi prosiectau ar raddfa fwy hefyd er mwyn ceisio am gyllid i helpu i arbed arian a dod â Thref Caerfyrddin yn nes at ei hamcanion sero net.

Caiff y prosiect hwn ei ariannu gan lywodraeth y DU a Ffyniant Bro.

Ymunodd Jude â ni o’r Adran Diogelwch Ynni a Sero Net (DESNZ).  Fe fydd hi’n gweithio ar gyflawni prosiectau ym meddiant y gymuned sydd yn arfaeth Ynni Teg yn ogystal ag ar sefydlu cyfleoedd newydd.

Mae gan Jude dros 25 mlynedd o brofiad o weithio ar brosiectau ynni a chynaliadwyedd amrywiol yng Nghymru yn cynnwys effeithlonrwydd ynni, datblygiadau solar ar raddfa fawr a chynllun gwresogi rhanbarthol.  Mae hi’n entrepreneur brwdfrydig hefyd, sydd wedi sefydlu nifer o ficrofusnesau ecogyfeillgar.