Cronfa Gymunedol Leol
Mae gwerthiant yr ynni a gynhyrchir gan ein hoffer cynhyrchu ynni adnewyddadwy yn darparu ffrwd reolaidd o incwm. Defnyddir yr incwm dros ben i gyrraedd amcanion cymdeithasol y gymdeithas o ran darparu budd lleol drwy ein cronfa gymunedol leol.

Mae ein gorsafoedd ynni yn Bwlchgwynt a Phenrhiw yng ngorllewin Cymru yn cynhyrchu incwm drwy werthu’r ynni dros ben a gynhyrchir i’r grid. Mae’r swm sydd ar gael at y diben hwn yn dibynnu ar berfformiad yr orsaf a phrisiau ynni cyfredol.
Rydym yn rhagweld y bydd y tyrbin a’r aráe paneli solar a osodwyd yn ddiweddar yn darparu o leiaf £15,000 y flwyddyn dros weddill oes weithredol y prosiectau. Rhagwelir y bydd ein tyrbin ym Mhenrhiw yn darparu £8,000 y flwyddyn, ynghyd â swm penodol o £2,000 y flwyddyn ar gyfer y cyngor cymuned lleol.
Bydd y swm gwirioneddol yn amrywio o flwyddyn i flwyddyn yn dibynnu ar y ceisiadau a dderbynnir, ac mae’n debygol y bydd yn cynyddu wrth i rwymedigaethau eraill leihau dros amser.
Sut i Wneud Cais am Gyllid
Os ydych chi’n byw yn ardal Meidrim neu yn ardal fwy eang gorllewin Sir Gaerfyrddin; neu’n byw yn ardal Henfynyw neu Aberaeron a’r cylch; ac mae gennych chi gais ar gyfer prosiect lleol er lles eich cymuned yr ydych chi’n ceisio cyllid ar ei gyfer, cysylltwch â ni os gwelwch yn dda.
Fe fyddai hi’n well gennym ni ariannu prosiectau sydd â rhywfaint o gysylltiad â’r amgylchedd neu newid hinsawdd (oherwydd honno yw ein cenhadaeth ni) ond y flaenoriaeth yw iddo fod yn rhywbeth y mae’r gymuned leol yn awyddus i’w weld yn digwydd.
Gellir gwneud cais am gyllid yn uniongyrchol, gan ddefnyddio’r ffurflen hon.
Os na ddefnyddir y cronfeydd blynyddol i gyd, fe fyddwn ni’n gwneud cyfraniadau at achosion priodol.
Ein Prosiectau a Gefnogwyd
Dyma rai o’r prosiectau a gafodd eu cefnogi:
Derbyniodd Cylch Meithrin Trelech grant o £5,000 i wella ac uwchraddio eu mannau ac offer dysgu a chwarae dan do ac awyr agored, gan gynnwys adnoddau addysgol a theganau sy’n hybu sgiliau llythrennedd, rhifedd a sgiliau echddygol manwl, ac yn hwyluso gweithgareddau chwarae rôl a chelfyddydau.


Cafodd Canolfan Gymunedol Trelech grant o £5,000 i ddarparu gardd synhwyraidd newydd – yn cynnwys arwyddion a phosteri dwyieithog gyda geiriau ac brawddegau addysgol a phaneli chwarae – ar gyfer eu man chwarae lleol.
Dyfarnwyd £5,000 i Ysgol Hafod Wennog i drawsnewid a gwella amgylchedd dysgu awyr agored yr ysgol er mwyn diwallu anghenion pob disgybl yn well, drwy ddarparu system ddiogel a hygyrch sy’n caniatáu symud yn rhydd rhwng yr ystafell ddosbarth a’r ardal awyr agored.
Rhoddwyd grant o £10,250 i Ysgol Gynradd Meidrim i greu llecynnau gweithgareddau awyr agored newydd gyda strwythurau, llwybrau a ffensys addurniadol.


Derbyniodd Eglwys Meidrim grant o £3,000 ar gyfer gwresogyddion a blwch rheoli newydd mwy effeithlon. Cafwyd gwelliannau i’w goleuadau a gosodwyd gwifrau newydd yn y system hefyd.
Mae Cyngor Cymuned Meidrim wedi derbyn sawl grant ar gyfer costau atgyweirio ac adnewyddu’r maes chwarae lleol yn y pentref.
Derbyniodd Cyngor Cymuned Llanwinio grant bychan tuag at atgyweirio ar gyfer cynnal a chadw’r Neuadd leol.
Banc Bwyd Caerfyrddin: Rydym ni wedi darparu rhoddion o £10,000 hyd yn hyn i’w rhoi at elusen Banc Bwyd Caerfyrddin a leolir yn Xcel Bowl ger Caerfyrddin sy’n rhoi cymorth uniongyrchol i rai mewn angen ar hyn o bryd.
Mae elusen Shelter Cymru wedi derbyn cyfraniadau o £6,000 tuag at eu gwaith yn cefnogi pobl mewn perygl o golli eu cartrefi neu sydd mewn llety dros dro o ganlyniad i’w sefyllfa ariannol.
